Առողջության ու գեղեցկության ցուցահանդես

Մեկնարկեց «EXPO BEUTY-2010»-ը Կ. Դեմիրճյանի անվան մարզահամերգային համալիրում երեկ մեկնարկեց «EXPO BEUTY–2010» միջազգային ցուցահանդեսը՝ նվիրված առողջության եւ գեղեցկության ինդուստրիային։

Նախաձեռնողը LOGOS EXPO Center ցուցահանդեսային ընկերությունն է, աջակիցները՝ ՀՀ առողջապահության եւ մշակույթի նախարարությունները։ «Հերթական այս ցուցահանդեսին մասնակցում են 50-ից ավելի առողջապահական եւ դեղագործական կազմակերպություններ, որոնց 30 տոկոսը՝ արտասահմանյան։ Այսպիսի միջոցառումները նպաստում են ոչ միայն ոլորտի նորություններին ծանոթանալուն, այլեւ նոր գործընկերներ ձեռք բերելուն»,-ասաց ՀՀ առողջապահության փոխնախարար Թաթուլ Հակոբյանը։

Առողջապահության նախարարությունն այս անգամ ներկայացրել է Համաշխարհային բանկի վարկային ծրագրով անցած տարվա վերջին հիմնանորոգումից եւ ժամանակակից սարքավորումներով հագեցվելուց հետո վերաբացված Հրազդանի բժշկական կենտրոնի եւ նույն վերափոխումներով մոտ ապագայում վերաբացվող Իջեւանի բժշկական կենտրոնի մանրակերտները։

Ներկայացվել է նաեւ Գյումրիի Ավստրիական հիվանդանոցի հարեւանությամբ կառուցվող նոր մասնաշենքը՝ ախտորոշիչ ժամանակակից կենտրոնով, հեմոդիալիզի, թերապեւտիկ, սրտաբանական վիրաբուժական բաժանմունքներով եւ այլ ծառայություններով։ Նախարարությունը ներկայացնում է նաեւ 2008-ին ներդրված անվճար ծննդօգնության ծրագիրը՝ հավաստելով դրա հետեւողական շարունակականության եւ մոնիտորինգի ապահովման մասին։

Մարզահամերգային համալիրի կամարների ներքո միախմբվել են առողջապահական ծառայություններ մատուցող, դեղ արտադրող եւ ներկրող կազմակերպություններ, կոսմետոլոգիական կլինիկաներ, սրահներ, հանդերձանքի ու բնակարանի հարդարմամբ զբաղվող ընկերություններ, ժողովրդական անհատ ստեղծագործողներ, հանդեսներ ու պարբերականներ։ Հնարավոր չէ թվարկել մասնակից շուրջ 100 կազմակերպությունների ցուցադրությունները։ Պարզապես նշենք, որ կանանց տոնի նախօրեին «EXPO BEUTY-2010»-ը առողջության ու գեղեցկության յուրօրինակ մի ավետաբեր է, ուր հնարավոր է գտնել փնտրածը։

Հ. Գ. Բարի ցանկությամբ կուզեինք կազմակեպիչներին եւ մասնակիցներին հուշել՝ ճիշտ կլիներ, որ չանտեսվեր մայրենի լեզուն։ Բոլոր տաղավարների ցուցապաստառները գրված էին միայն անգլերենով, իսկ մասնակիցները ներկայանում էին հիմնականում ռուսերենով։

Հարցեր, պատասխաններ, մեկնաբանություններ